കുറവിലങ്ങാട്: കേരളത്തിലെ സർക്കാർ, എയ്ഡഡ് കോളേജുകളുടെ ഗുണനിലവാരം മൂല്യനിർണയം നടത്തുന്ന കെഐആർഎഫ് റാങ്കിങ്ങിന്റെ ആദ്യ അൻപതിൽ സ്ഥാനം നേടി കുറവിലങ്ങാട് ദേവമാതാ കോളേജ് വീണ്ടും മികവ് തെളിയിച്ചു. കോട്ടയം ജില്ലയിലെ ഓട്ടോണമസല്ലാത്ത ആർട്സ് ആൻഡ് സയൻസ് കോളേജുകളിൽ ഏറ്റവും ഉയർന്ന റാങ്ക് ലഭിച്ചിരിക്കുന്നത് ദേവമാതായ്ക്കാണ്. ദേശീയ ഏജൻസിയായ നാക് നടത്തിയ ഗുണനിലവാര പരിശോധനയിൽ 3.67 പോയിന്റോടെ പരമോന്നത ബഹുമതിയായ എ പ്ലസ് പ്ലസ് ഗ്രേഡ് ദേവമാതാ കഴിഞ്ഞവർഷം നേടിയിരുന്നു. നാക് വിലയിരുത്തലിൽ കോട്ടയം ജില്ലയിലെ ഏറ്റവും മികച്ച കോളേജായി തിരഞ്ഞെടുക്കപ്പെട്ടു. ദേശീയ ഏജൻസിയായ എൻ.ഐ.ആർ.എഫ്. നടത്തിയ വിലയിരുത്തലിലും മികച്ച സ്ഥാനം കൈവരിച്ചിരുന്നു.
നാകിന്റെയും എൻഐആർഎഫ് ന്റെയും പ്രവർത്തനങ്ങൾ ഏകോപിപ്പിച്ച ഡോ. ടീന സെബാസ്റ്റ്യനാണ് കെ ഐ ആർ എഫ് കോഡിനേറ്ററായും പ്രവർത്തിച്ചത്. കോളേജ് മാനേജർ ആർച്ച് പ്രീസ്റ്റർ ഫാ. അഗസ്റ്റിൻ കൂട്ടിയാനിയിൽ, പ്രിൻസിപ്പൽ ഡോ. സുനിൽ സി.മാത്യു, വൈസ് പ്രിൻസിപ്പൽ ഫാ. ഡിനോയ് കവളമ്മാക്കൽ, ബർസാർ ഫാ. ജോസഫ് മണിയൻചിറ എന്നിവരുടെ നേതൃത്വത്തിലുള്ള കൂട്ടായ പ്രവർത്തനമാണ് ദേവമാതായെ ഈ മികവിലേക്ക് എത്തിച്ചത്.
ബുക്കർമാൻ ന്യൂസ്, കുറവിലങ്ങാട്
